सर्लाहीको कौडेना गाउँपालिकामा नयाँ प्रमुख प्रशासकीय अधिकृत सुरेशप्रसाद दास सोमवारबाट हाजिर भएका छन् । गाउँपालिकामा सरुवा भई आएका दासलाई अध्यक्ष रूपेश कुमार (बब्लु) ले दोषाला ओढाई स्वागत गरेका हुन् । प्रमुख प्रशासकीय अधिकृत दास केही साताअघि मात्रै जिल्ला प्रशासन कार्यालय सर्लाहीबाट सरुवा भएर सप्तरीको छिन्नमस्ता गाउँपालिका पुगेका थिए ।संघीय मामिला तथा सामान्य प्रशासन मन्त्रालयले गत कात्तिक २१ गते दासलाई छिन्नमस्ता गाउँपालिकाबाट कौडेना गाउँपालिकाको प्रमुख प्रशासकीय अधिकृतको रुपमा सरुवा गरेको हो । कौडेना गाउँपालिकाका यसअघि १० महिनासम्म आयूर्वेद शाखाका कविराज डा. सोनेलाल साहले निमित्त प्रमुख प्रशासकीय अधिकृत भई जिम्मेवारी सम्हालेका थिए ।पदभार ग्रहण समारोहमा गाउँपालिका अध्यक्ष रूपेश कुमार (बब्लु),उपाध्यक्ष नगिना देवी, आयूर्वेद शाखाका कविराज डा. सोनेलाल साह,लेखा प्रमुख हरिनारायण साह, सूचना अधिकारी पंकज यादव लगायतको उपस्थिती रहेको थियो । स्वागत मन्तव्य लेखा प्रमुख हरिनारायण साहले राखेका थिए ।कार्यभार सम्हालेपछि प्रमुख प्रशासकीय अधिकृत दासले कार्यालय अनुशासन र समयपालनामा कडाइका साथ ध्यान दिन आग्रह गरे । उनले सबै कर्मचारीलाई बिहान १०ः१५ भित्र अनिवार्य हाजिर हुन निर्देशन दिँदै ढिलो आउने कर्मचारीको हाजिरी नहुने चेतावनी दिएका छन् । साथै, दासले सबै कर्मचारीले अनिवार्य रूपमा कार्यालय पोसाक लगाएर कार्यालयमा उपस्थित हुनुपर्ने व्यवस्था कार्यान्वयन गर्ने बताएका छन् ।सर्लाहीको गोडैता नगरपालिका–८ निवासी शाखा अधिकृत दासले गाउँपालिकाको सेवा प्रवाहलाई प्रभावकारी, पारदर्शी र अनुशासित बनाउने प्रतिबद्धता व्यक्त गरेका छन् ।