सर्लाहीको पर्सा गाउँपालिकाले तीन दिन ढिलो गरि आज १५ औँ गाउँ सभामा आर्थिक वर्ष २०८२/८३ को नीति तथा कार्यक्रम र बजेट प्रस्तुत गरेको छ । गाउँपालिका अध्यक्ष धीरेन्द्र राय (विस्पत) ले गाउँ सभामा ३४ करोड ३१ लाख ८६ हजार रुपैयाँ बराबरको अनुमानित बजेट प्रस्तुत गरेका हुन् ।यो सँगै सर्लाहीमा २० वटै पालिकाले बजेट ल्याएका छन् । स्थानीय तहले असार १० गतेभित्र आ–आफ्नो गाउँ तथा नगर सभामा बजेट प्रस्तुत गर्नुपर्ने प्रावधान रहेपनि पर्सा गाउँपालिकामा भने बजेट बाँडफाँडको विषयमा उपाध्यक्ष र वडाध्यक्षको गाउँपालिका अध्यक्षसँग सहमती नहुँदा ३ दिन ढिलो गरी गाउँ सभा गरिएको हो । सर्लाहीका अन्य १९ पालिकाले असार १० गतेभित्रै नीति, कार्यक्रम र बजेट प्रस्तुत गरेका थिए ।शुक्रबार गाउँसभाको उद्घाटन समारोहमा गाउँपालिका उपाध्यक्ष नुतन देवीसहित वडाध्यक्षहरु समेत सहभागी भएका थिए । समारोहमा अतिथिहरुलाई मायाको चिनो प्रदान गरिनुका साथै गाउँपालिका भित्रका उत्कृष्ट कर्मचारीलाई सम्मान पनि गरिएको हो ।गाउँपालिकाको १५ औँ गाउँ सभाको मधेश प्रदेशसभा सदस्य जङ्गीलाल रायको प्रमुख आतिथ्यता तथा छिमेकी हरिपूर्वा नगरपालिकाका नगर प्रमुख विनोदकुमार साह तेली र कोष तथा लेखा नियन्त्रक कार्यालय (कोलेनिका) सर्लाहीका प्रमुख पुष्पराज गुरागाईंको विशिष्ठ आतिथ्यतामा उद्घाटन गरिएको हो ।