सर्लाही ,राष्ट्रिय कार्यक्रम अनुरूप सञ्चालन हुन लागेको दादुरा रुबेला खोप सम्बन्धी सर्लाहीको विष्णु गाउँपालिकामा पनि व्यापक तयारी भइरहेको छ । विष्णु गाउँपालिका स्वास्थ्य शाखा,स्वास्थ्य केन्द्र लगायतका स्वास्थ्य संस्थाहरूमा सरोकारवालाहरुसँग अभिमुखीकरण कार्यक्रम गरी दादुरा रुबेला खोप सम्बन्धी जानकारी गराइएको छ । यसैक्रममा सोमवार विष्णु गाउँपालिका स्वास्थ्य शाखाको आयोजनामा दादुरा रुबेला खोप अभियान सम्बन्धी सरोकारवालाहरूसँग अभिमुखिकरण कार्यक्रम गरिएको छ ।विष्णु गाउँपालिका कार्यालयको सभाहलमा सञ्चालित पालिका स्तरीय अभिमुखिकरण कार्यक्रममा विष्णु गाउँपालिका कार्यालय स्वास्थ्य शाखाका प्रमुख अंजय कुमार यादव ले राष्ट्रिय कार्यक्रम अनुरूप विष्णु गाउँपालिका कार्यालय स्वास्थ्य शाखाले समेत खोप अभियान सञ्चालन गर्न लागेको जानकारी दिनुभयो । फाल्गुन १६ गतेदेखि फागुन २२ गतेसम्म सञ्चालन हुने उक्त अभियानमा विष्णु गाउँपालिका को ८ वडाका ४० स्थानबाट खोप प्रदान गरिने छ । ९ महिनादेखि १५ वर्षमुनिका करिब ९ हजार ४ सय बालबालिकालाई खोप दिइने छ । परिवार सहित आउने भारतीय बालबालिका, जो इँटा उद्योग सहितका विभिन्न उद्योगमा काम गर्दै आएका छन्, ती बालबालिका खोपबाट वञ्चित हुने अवस्थामा जोखिम कायमै रहेकोले अभियानमा लक्षित उमेर समूहका सबै बालबालिकालाई खोप दिनु अनिवार्य छ भनी विष्णु गाउँपालिका का अध्यक्ष जवाहर लाल रायले बताउनु भयो । विष्णु गाउँपालिका कार्यालयले दादुरा रुवेला रोग विरुद्धको राष्ट्रिय खोप अभियानका लागि सहयोग गर्न सबैलाई आव्हान गरेको छ ।