कौडेना-कौडेना गाउँपालिकालाई पूर्ण खोप सुनिश्चितता तथा दिगोपना गाउँपालिका घोषणा गरिएको छ।आर्थिक वर्ष २०८२/८३ का लागि गाउँपालिकाभित्रका ०-५९ महिनासम्मका सबै बालबालिकाले राष्ट्रिय खोप तालिकाअनुसार खोप प्राप्त गरेपछि गाउँपालिकालाई शुक्रवार पूर्ण खोप सुनिश्चितता घोषणा गरिएको हो।‘स्थानीय स्रोतको उपयोग,स्वामित्व र सहभागिताः पूर्ण खोप, सुरक्षित भविष्य’भन्ने मूल नारासहित आयोजित कार्यक्रममा कौडेना गाउँपालिकालाई औपचारिक रूपमा पूर्ण खोप सुनिश्चितता तथा दिगोपना गाउँपालिका घोषणा गरिएको गाउँपालिकाको स्वास्थ्य शाखा प्रमुख प्रमोद ठाकुरले जानकारी दिए ।सरोकार भएकाहरूको समन्वय र
मातहतका स्वास्थ्य संस्थाहरूको सक्रियतामा मापदण्डअनुसार ७ वटै वडाका लक्षित उमेर समूहका बालबालिकालाई पूर्ण खोप सेवा प्रदान गरिएपछि यस्तो घोषणा गरिएको उनले बताए ।“गाउँपालिकाभित्रका सबै ०–५९ महिनाका बालबालिकाले नियमित खोप प्राप्त गरेपछि विभिन्न चरणको प्रमाणीकरण प्रक्रिया पूरा गरी गाउँपालिकालाई पूर्ण खोप सुनिश्चितता घोषणा गरिएको हो”,ठाकुरले भने ।गाउँपालिका अध्यक्ष तथा गाउँपालिका खोप समन्वय समितिका संयोजक रुपेश कुमार(बब्लु)ले पूर्ण खोप सुनिश्चितता घोषणा गर्नु मात्र उपलब्धि नभएकाले अब यसको दीगोपनामा ध्यान दिनुपर्नेमा जोड दिए । उनले आगामी दिनमा पनि सबै सरोकार भएका निकाय,स्वास्थ्यकर्मी,
जनप्रतिनिधि,महिला स्वास्थ्य स्वयंसेविका तथा समुदायको सहकार्य जरुरी रहेको बताए ।गाउँपालिकाका प्रमुख प्रशासकिय अधिकृत सुरेश प्रसाद दासले विगतको तुलनामा अभिभावकमा स्वास्थ्यसम्बन्धी चेतना वृद्धि भएकाले
बालबालिकालाई नियमित खोप लगाउने दरमा उल्लेखनीय सुधार आएकाले पूर्ण खोप सुनिश्चितता अभियान सफल भएको बताए ।