सर्लाही । सर्लाही जिल्लाका विभिन्न स्थानीय तहमा धान भित्र्याउने चटारोसँगै किसानहरूले सडक पेटी तथा बाटोमै धान थुपार्न थालेपछि सवारी दुर्घटनाको जोखिम बढेको छ। ग्रामीण भेगका हुलाकी तथा गाउँका सडकमा धान राख्ने, थ्रेसर लगाएर दाइँ गर्ने कार्य बढ्दा दैनिक आवागमन प्रभावित भएको स्थानीयवासीको गुनासो छ।कौडेना गाउँपालिका वडा नम्बर ३ का स्थानीय गणेश साहका अनुसार मुख्य सडकभन्दा बढी ग्रामीण सडकमा धान थुपारिँदा मोटरसाइकल चालक र पैदल यात्रु जोखिममा परेका छन्। सडकमै थ्रेसर चलाउँदा उड्ने धुलो आँखामा परेर हिँड्नै गाह्रो हुने गरेको उनले बताए।कौडेना गाउँपालिका, गोडैता नगरपालिका,बसबरिया गाउँपालिका, बलरा नगरपालिका लगायतका क्षेत्रमा किसानले बाटोमै धान, पराल थुपार्ने र दाइँ गर्ने गर्दा आवागमनमा समस्या सिर्जना भएको बटुवाहरूले बताएका छन्। ढलान भएका गाउँका सडकमा गुड्ने सवारीसाधनले अगाडि धान थुपारिएको थाहा नपाउँदा दुर्घटना हुने गरेको स्थानीयको भनाइ छ।चेतनाको कमीका कारण बाटोमै धान राख्ने र थ्रेसर चलाउने कार्य भइरहेको कौडेना निवासी राजेस चौधरीले बताए। उनले सडकमा धान दाइँ गर्ने क्रममा विद्युतको तारमा ठोक्किएर सर्ट भई आगलागीको जोखिम समेत बढेको बताए ।स्थानीयवासीहरूले सडक सुरक्षालाई ध्यानमा राखी सडकमै धान थुपार्ने र थ्रेसर चलाउने कार्य रोक्न तथा जनचेतना अभिवृद्धि गर्न सम्बन्धित निकायले तत्काल पहल गर्नुपर्ने माग गरेका छन्।