सर्लाही फाल्गुण १६ गते – सर्लाहीको चक्रघट्टा गाउँपालिकामा मंगलवारदेखि शुरु भएको तेस्रो राष्ट्रपति रनिङ्ग शिल्ड खेलकुद प्रतियोगिता २०८० बुधवार सम्पन्न भएको छ ।चक्रघट्टा गाउँपालिका शिक्षा, युवा तथा खेलकुद शाखाको आयोजनामा आयोजित प्रतियोगिता पालिकाको ४ ओटा माध्यमिक विद्यालयको सहभागिता रहेको थियो । पालिकाको वडा नं. १ शिवनगरको खेल मैदानमा आयोजना गरिएको प्रतियोगितामा जनता माध्यमिक विद्यालय चक्रघट्टा ५ पडरिया प्रथम भएका छन् ।पडरियाले ७ स्वर्ण, ४ काँस्य र २ रजत पदक जित्दै प्रथम स्थान प्राप्त गरेका छन् । त्यसैगरी ५ स्वर्ण, ७ काँस्य र ३ रजत पदकका साथ रामजानकी माध्यमिक विद्यालय चक्रघट्टा ९ खोरिया दोस्रो स्थान प्राप्त गरेका छन् । त्यसैगरी ३ स्वर्ण, २ काँस्य र ९ रजत सहित जनता माध्यमिक विद्यालय चक्रघट्टा २ बेल्ही तृतीय स्थान प्राप्त गरेका छन् ।प्रतियोगितामा पुरुष तर्फ ९ वटा र महिला तर्फ ८ ओटा खेल संचालन गरिएको शिक्षा, युवा तथा खेलकुद शाखा प्रमुख रामस्वार्थ यादवले जानकारी दिएका छन् ।समापन कार्यक्रममा गाउँपालिकाका प्रमुख प्रशासकीय अधिकृत संजिव कुमार यादवले प्रथम, दोस्रो तथा तेस्रो स्थान प्राप्त गरेका विद्यालयहरुलाई ट्रफी प्रदान गरेका थिए ।