सर्लाही, ३० फागुन । स्वतन्त्र विद्यार्थी युनियन (स्ववियु) को चुनाव अन्तर्गत सर्लाही क्याम्पसमा मंगलबार उम्मेदवारको मनोनयन दर्ता भएको छ ।सर्लाही क्याम्पसमा स्ववियु निर्वाचनका लागि जसपा र लोसपा निकट विद्यार्थी गठबन्धनबाट समाजवादी विद्यार्थी युनियन नेपालको तर्फबाट सभापतिमा रामप्रवेश साह, लोकतान्त्रिक विद्यार्थी संघको तर्फबाट उपसभापतिमा आकाश यादव मनोनयन दर्ता गराउनुभएको छ । नेपाली कांग्रेस निकट नेपाल विद्यार्थी संघ (नेविसंघ) बाट सभापतिमा सुजित यादव उम्मेदवारी दिनुभएको छ । त्यस्तै एमाले–जनमत गठवन्धनबाट सभापतिमा एमालेका धर्मेन्द्र यादवले उम्मेदवारी दर्ता गराउनुभएको छ । त्यस्तै माओवादी निकट विद्यार्थी, नेसपा र नेकपा ऐस निकट विद्यार्थीहरुले पनि केही पदमा उम्मेदवारी दर्ता गराएको सर्लाही क्याम्पसले जनाएको छ । सभापतिमा ३ जना, उपसभापतिमा ५ जना, सचिवमा ४ जना, कोषाध्यक्षमा ५ जना, सह–सचिवमा ४ जना र सदस्यमा २२ जनाको उम्मेदवारी परेको जनाईएको छ ।चैत ५ गते स्वतन्त्र विद्यार्थी युनियन (स्ववियु)को सर्लाहीसहित देशैभरी निर्वाचन हुने मिति निर्धारण गरिएको छ ।/CP/