गोडैता, २३ असोज – सर्लाहीको गोडैतास्थित नेशनल लघुवित्त वित्तीय संस्थाको शाखा कार्यालयले बाढी पीडित आफ्ना ८० जना ग्राहकलाई राहत वितरण गरेको छ ।संस्थाले डेढ हप्ताअघिको भारी वर्षापछि प्रभावित बनेको गोडैता, बलरा र रामनगरका बाढी पीडित ग्राहकलाई हिजो गोडैतामा भेला पारेर राहत वितरण गरेको हो । ८० जना ग्राहकलाई जनही २५ किलो चामल, दुई किलो दाल, तीन किलो आलु, एक किलो नुन र एक लिटर खानेतेल वितरण गरिएको नेशनल लघुवित्त वित्तीय संस्था गोडैता शाखाका कार्यालय प्रमुख उपेन्द्र यादवले जनाएको छ ।संस्थाका केन्द्रिय कार्यालय प्रतिनिधि एवं अनुगमन अधिकृत बालिसटर यादवको अध्यक्षता तथा गोडैता नगरपालिकाका मेयर देवेन्द्र यादवको प्रमुख आतिथ्यतामा आयोजित कार्यक्रममा अन्य स्थानीय जनप्रतिनिधि र बाढी पीडितको सहभागी भएका थिए ।संस्थाको गौरीबास शाखाका प्रमुख जामनुप्रसाद यादवले संचालन गरेको कार्यक्रममा गोडैता शाखाका प्रमुख उपेन्द्र यादवले स्वागत मन्तव्य व्यक्त गरे ।कार्यक्रमका अध्यक्ष बालिसटर यादवले मन्तव्यमा संस्थाको सामाजिक उत्तरदायित्वलाई विशेष जोड दिए। उनले भने, “यो संस्था केवल वित्तीय सेवा प्रदान गर्ने मात्र होइन, संकटको समयमा समाजका पीडित सदस्यहरूको सेवामा पनि समर्पित छ।”बालिसटर यादवले भविष्यमा पनि यस्ता कार्यक्रमहरू सञ्चालन गर्ने प्रतिबद्धता व्यक्त गरे।राहत वितरण कार्यक्रममा उपस्थित स्थानीयवासी र अन्य अतिथिहरूले संस्थाको यो प्रयासको उच्च प्रशंसा गरे। उनीहरूले संकटको समयमा यस किसिमको सहयोगले बाढी पीडितहरूको मनोबललाई बलियो बनाउन मद्दत गर्ने कुरा राखे।यस प्रकारको कार्यक्रमले बाढी प्रभावितहरूको तत्कालिक समस्या समाधान गर्न मद्दत पुर्‍याउँछ भने आगामी दिनमा पनि यस्ता कार्यक्रमहरू निरन्तर रुपमा आयोजना गरिनु पर्नेमा सहभागीहरूको सहमति देखियो। राहत सामग्री प्राप्त गरेपछि पीडित परिवारहरूले संस्थाको यो मानवीय प्रयासको प्रशंसा गर्दै धन्यवाद व्यक्त गरेका थिए।