सर्लाही- असोज १२ गते आएको बाढीमा परी मृत्यु भएका दुई जनाको परिवारलाई बलरा नगरपालिकाले आर्थिक सहायता स्वरूप १/१ लाख रूपैयाँ क्षतिपूर्ति दिने निर्णय गरेको छ। बलरा वडा नं.३ का अंकित ठाकुर र बलरा वडा नं.१ का पवन गिरी बाढीमा परेर ज्यान गुमाएका थिए। मृतकका परिवारलाई सान्त्वना दिन र सहयोगको घोषणा गर्न नगर प्रमुख रामाशंकर प्रसाद कुशवाहा व्यक्तिगत रूपमा उनीहरूको घरमा पुगेका थिए।कुशवाहाले दुबै परिवारलाई नगद २५/२५ हजार रुपैयाँ तत्काल हस्तान्तरण गरेका छन्। बाँकी रकम भने मृतक परिवारका सदस्यहरूको बैंक खातामा स्थानान्तरण गरिनेछ। नगरपालिकाले बाढीबाट प्रभावित परिवारहरूलाई आवश्यक सहयोग पुर्‍याउन प्रतिबद्धता समेत जनाएको छ। बाढीले बलरा नगरपालिकाका अन्य स्थानहरूमा पनि ठूलो क्षति पुर्‍याएकोले नगरपालिकाले प्रभावित परिवारहरूलाई थप सहयोग उपलब्ध गराउन पहल गर्ने बताइएको छ।उनले थप सहयोगका लागि प्रदेश र संघीय सरकारसँग अनुरोध गरिएको जानकारी दिए।