चक्रघट्टा,माघ १६ – सर्लाहीको चक्रघट्टा गाउँपालिकाले आफ्नो पालिका अन्तर्गतका वृद्धवृद्धा, एकल महिला, अशक्त, अपाङ्ग र अन्य लाभग्राहीलाई वडामै पुगेर सामाजिक सुरक्षा भत्ता वितरण गर्न सुरु गरेको छ ।गाउँपालिकाका अध्यक्ष कृष्ण कुमार यादवले सोमबार वडा नं. १ शिवनगरमा पुगेर यस कार्यक्रमको उद्घाटन गरेका हुन् । गाउँपालिकामा आएर भत्ता लिन टाढा पर्ने र सास्ती समेत खेप्नु पर्ने भएपछि वडाबाटै भत्ता बितरण कार्यको सुरुवात गरिएको चक्रघट्टा गाउँपालिकाले जनाएको छ ।बैंकका कर्मचारी तथा पालिकाका कर्मचारी सम्बन्धित वडामा पुगेर सोमबारदेखि भत्ता बितरण गर्न थालेका छन् । पैदल वा सवारी साधनमा भत्ता बुझ्न आउँदा बृद्धबद्धालाई निकै समस्या हुने गरेको थियो ।आर्थिक वर्षको पहिलो किस्ताको रकम गाउँमै गएर बितरण गर्ने योजना थियो । तर, केही कठिनाईका कारण पहिलो किस्ताको रकम बाँड्न नसकिएको गाउँपालिकाका प्रमुख प्रशासकीय अधिकृत संजिक कुमार यादवले बताए ।कर्मचारी व्यवस्थापन भएपछि दोस्रो किस्ताको रकम वडामै गएर बितरण गर्न थालिएको अधिकृत यादवले बताए । गाउँमै आएर भत्ता बितरण भएपछि बृद्धबृद्धालाई निकै सहज भएको चक्रघट्टा गाउँपालिकाका स्थानीय भाग्य नारायण महतोले बताएका छन् ।यसअघि आइतबारदेखि मात्रै हरिपुर नगरपालिकाले पनि वडाबाटै भत्ता वितरण सुरु गरेको थियो ।