सर्लाहीको कौडेना गाउँपालिकाका जनप्रतिनिधिले एक महिनाको सेवासुविधा बापत प्राप्त हुने रकम बाढी पीडितका लागि प्रदान गर्ने भएका छन् ।रसुवास्थित भोटेकोशी बाढी प्रभावित व्यक्तिहरुको उद्धार, राहत र पुनस्र्थापनाका लागि गाउँपालिकाका सम्पूर्ण जनप्रतिनिधिको तर्फबाट एक महिनाको सेवासुविधा बापतको ५ लाख ५५ हजार रुपियाँ बाढी पीडितलाई प्रदान गर्ने निर्णय गरिएको हो । यस्तै गाउँपालिकाभित्र कार्यरत कर्मचारीले पनि आफ्नो तलबबाट बाढी पीडितका लागि ७ लाख ८५हजार ९००रुपियाँ प्रदान गर्ने भएका छन् । अधिकृतस्तरका कर्मचारीको सात दिनको, सहायक स्तरको कर्मचारीको पाँच दिनको र श्रेणीविहीन कर्मचारीको दुई दिनको तलब बाढी पीडितलाई प्रदान गरिने छ ।यस्तै, सामुदायिक विद्यालयमा कार्यरत मावि शिक्षकको सात दिनको, आधारभूत शिक्षकको पाँच दिनको र सहयोगी कर्मचारीको दुई दिनको तलब बापतको ६ लाख १७हजार २०० रुपियाँ बाढी पीडितलाई प्रदान गरिने भएको छ ।गाउँपालिका अध्यक्ष रुपेश कुमार (बब्लु), प्रमुख प्रशासकीय अधिकृत सुरेश प्रसाद दासले संयुक्त रुपमा हस्ताक्षर गरी प्रेस विज्ञप्ती जारी गर्दै जनप्रतिनिधि, कर्मचारी तथा शिक्षकको तर्फबाट बाढी पीडितलाई यस प्रकारको सहयोग गरिएको जानकारी गराएका हुन् ।उक्त रकम ‘प्रधानमन्त्री दैवी प्रकोप उद्धार कोष’ मा जम्मा गरिने कौडेना गाउँपालिकाले जनाएको छ।