सर्लाही-सर्लाही जिल्लाको गाडैता नगरपालिकाको वार्ड नंबर ८ तरकारी बजारमा बनेको सार्वजनिक शौचालयको उचित व्यवस्थापन नहुँदा व्यापारी,ग्राहकर,र तरकारी किनमेल गर्न आउने सर्वसाधारणलाई ठूलो असुविधा भएको छ। शौचालयको सरसफाइ अभावका कारण शौचालयको अवस्था अत्यन्तै बिग्रिएको छ। शौचालयभित्र रक्सीका बोतल, सिगरेटका ठुटा,र अन्य फोहोर पदार्थहरू छरपस्ट अवस्थामा फालिएका छन्,जसले गर्दा दुर्गन्ध फैलिएको र स्वास्थ्य जोखिम बढाएको स्थानीयहरूले गुनासो गरेका छन्।दैनिक सयौं मानिसहरू यस बजारमा किनमेल गर्न आउने गर्दछन्,तर शौचालयको अवस्थाले गर्दा उनीहरूलाई विकराल परिस्थितिको सामना गर्नुपरेको छ। विशेष गरी महिलाहरू, वृद्धवृद्धा,र बालबालिकाहरूलाई शौचालयको अभावले थप समस्या सृजना हुने गरेको छ। शौचालयको प्रयोग गर्न नसकिने अवस्थामा पुगेकाले धेरैले सार्वजनिक स्थलमै शौच गर्नुपर्ने बाध्यता भएको स्थानीयहरू बताउँछन्।बजारका व्यापारी र उपभोक्ताहरूले पटकपटक नगरपालिका र बजार व्यवस्थापन समितिलाई शौचालयको मर्मत तथा सरसफाइ गर्न आग्रह गरेका छन्,तर हालसम्म पालिकाले कुनै ठोस कदम उठाएको छैन। शौचालयको यो हालतका कारण बजारमा आउने मानिसहरूको संख्या घट्न सक्ने चिन्ता व्यापारीहरूले व्यक्त गरेका छन्। स्थानीयहरूले शौचालय व्यवस्थापन सुधार गर्न र बजारको सरसफाइमा तत्काल ध्यान दिन पालिकालाई आग्रह समेत गरेका छन्।